ههڵبهت ئهز نه مرۆڤهکێ یاسازانم، لێ ئهز دزانم دهما سکالا ل دژی کهسهکی دهێته تۆمارکرن. دادگههـ ئاگههداریا وی کهسی دکهت چ ب رێکا پۆستی یان ژی ب بهلاڤکرنا ئاگههدارییهکێ د رۆژنامهیهکێدا، دا ئهو ژی ئیفادهیێن خوه بدهت یان بریکارهکی ل شوونا خوه دانیت. ههر ژ بهر ڤێ چهندێ ژی ئهڤه چهندین رۆژ بوون من دخواست بنگههێ دروستێ ڤێ نووچهیێ بزانم و من خوه گههانده هندهک جهێن پهیوهندیدار ژی، لێ مخابن ئهز نهشیام تشتهکێ کۆنکریت ب دهست خوهڤه بینم. ڤێ چهندێ ژی گومان ل دهف من دروستکر و ئهز پالدام کو ڤێ رۆنکرنێ بهلاڤکهم.
بهری ههر تشتهکی من دڤێت بێژم کو هیچ لایهنهکی ئهز ئاگههدار نهکریمه کو سکالایهک دژی من هاتییه تۆمارکرن. لێ ب راستی بهردهوام ئیمایلێن گهفکرنێ بۆ من دهێن و جارهکێ ژی بهرپرسهکی ب تهلهفۆنێ گۆتبوو من کو وان پشکنینا ناڤێ من کرییه دا بزانن کا چ مولک ل سهر ناڤێ من ههیه!؟. لهوما دهما ئهڤ نووچه بهلاڤ بووی و لایهنێن پهیوهندیدار رۆنکرن نهداین، گومان ل دهف من چێبوو کو سکالا ل من هاتبن کرن. ژبهر کو من گهلهک جاران تێبینی ل سهر کارێن دهسههلاتدارێن وێ دهڤهرێ و هندهک پهیرهوێن کهڤنێن جڤاکی و ئۆلی ههبووینه و ههردهم من ئاماژه پێ کرییه.
ژبلی ڤێ ژی دنڤیسێن مندا دیاره کو ئهز لایهنگرێ گوهرینێ مه، لێ نه ئهڤ گۆڕانا کو ژ یهکێتیێ ڤهبووی. بهلکو گوهرینهکا کو مه ب یهکجاری ژ بهغدا و داگیرکهرییا هزار و چارسهد سالان رزگارکهت. ناڤهرۆکا ههموو نڤیسان ژی دکهڤیته دقالبێ بهرژهوهندا نیشتیمانی دا و ههر کهسهک دشێت ڤێ چهندێ تێبینی بکهت، چونکی من ل سهر بای نه نڤیسینه کو بفڕن و بهرزهببن. پاشی خهلکهک بهێت و تاوانا دژمناتیا نیشتیمانی بێخیته ستوویێ من، ئهو خهلکێ کو حهساب دکهن ئهو نیشتیمانێ مهنه و دخوازن ناڤێ من رهش و کرێت بکهن. ئهڤه ژی ناڤزراندن و دژمناتییه و قهت ناهێته قهبوولکرن.. ماف ژی دێ ههر بۆ خودانێن خوه زڤریت.
