بێری و شکاندنا گۆپاڵێ شڤانی

به‌ڕۆژ ئاف سارکی

کوردستان وه‌لاته‌کێ جوان و ب ناڤ و ده‌نگه‌ ب خوه‌دی کرنا ته‌رش و که‌والی ، و ژبه‌ر کو سروشتێ کوردستانێ ل هه‌رچوار وه‌رزێن سالێ تایبه‌تمه‌ندیا خوه‌ هه‌یه‌ ئه‌ف چه‌نده‌ پتر هاریکار بوویه‌ ژبو خوه‌دی کرنا ته‌رش و که‌والی .

ل زڤستانێ ژبه‌ر سه‌قایێ به‌فرین و سار ته‌رش د ژۆرێن تایبه‌ت دا دهێته‌ خوه‌دی کرن کو دبێژنێ گووڤ  یان(کول) داکو بهێنه‌ پاراستن و دگه‌ل هاتنا بهارێ و بشکفتنا کولیلکا په‌ز ده‌ست ب زانێ دکه‌ت و دهێته‌ دۆتن ، ل ده‌ستپێکا بهارێ و ژبو مێژوک کرنا به‌رخ و کارا و دۆتنا په‌زی بێری دێ چیته‌ بێرێ دا کو ب مێژوک کرنێ و دۆتنێ رابیت ئه‌ ف چه‌نده‌ ژی د هه‌یڤا ئادارێ دا ده‌ستپێ دکه‌ت ، و ڕۆژا ئێکێ یا ده‌ستپێ کرنا دۆتنا په‌زی هه‌می بێری پێکڤه‌ دێ قه‌ستا وی جهێ په‌ز ئینایێ که‌ن کو دبێژنێ (مه‌خه‌ل) دا ب دۆشن ، ل ده‌مێ دگه‌هنه‌ مه‌خه‌لێ په‌زی بێ گیرو بوون دێ ئه‌ف بێریه‌ هێرش که‌نه‌ شڤانی دا گۆپاڵێ وی ژێ بستینن!! گه‌له‌ک جارا شڤان پێکولێ دکه‌ت گۆپاڵێ خوه‌ نه‌ده‌ته‌ڤێ و به‌ره‌ڤانیێ دکه‌ت به‌لێ بێری گه‌له‌کن دێ هه‌ر ژێ ستینن ، ده‌مێ ژێ ستاند دێ ڤی گۆپاڵی شکێنن و پرتێن وی ل سه‌ر خوه‌ به‌ڵاف که‌ن و هه‌ر بێریه‌ک دێ پرته‌کا گۆپاڵی به‌ته‌ مال و ل ده‌مێ شیری دکه‌لینیت دێ وێ پارچا گۆپاڵی  ل بن شیری سۆژیت دا کو به‌ره‌که‌ت ب که‌ڤیته‌ شیری و به‌رهه‌مێن ڤی شیری زێده‌ ببن! ئه‌ڤه‌ ژی ئێکه‌ ژ که‌ڤنه‌ باوه‌رێت ملله‌تێ کورد کو ببو ڕه‌وشت ل ده‌ف باب و کالێن مه‌ .

چاپ